Сайтка кириу

«Абат аўыл»да мәмлекетлик хызметлер көрсетилмекте

     ϴзбекстан Республикасы Президентиниң 2018-жыл 29-март күнги «Абат аўыл» бағдарламасы ҳаққындағы 5386-санлы парманы қабыл етилип, усы жылдың 1 апрелинен баслап республиканың ҳәр бир район ҳәм қаласында, ең алды менен шетки, тәбийий шараяты аўыр аймақларда 2018-жылда 2, келеси жылларда 3 аўыл (мәҳалле)да халықтың жасаў шәраятларын жақсылаў, турмыс тәрзи ҳәм дәрежесинде сезилерли өзгерислерди тәмийинлеўге, бул аўыллардың көринисин заманагөйлестириўге ҳәм онда жасаўшы пуқаралар ушын жумыс орынларын жаратыўға қаратылған «Абат аўыл» бағдарламасын әмелге асырыў белгиленди.

Бул пәрманға муўапық Тахтакөпир районында 2018-жылда «Атакөл» аўыл пуқаралар жыйыны ҳәмде «Қараой» аўыл пуқаралар жыйыны «Абат аўыл» бағдарламасына киритилип, бул аймақларда бүгинги күнде бир қатар унамлы жумыслар әмелге асырылды.

Тахтакөпир районы Мәмлекетлик хызметлер орайы хызметкерлери тәрепинен «Абат аўыл»ларда көшпели мәмлекетлик хызметлер көрсетилип келинбекте. Соның менен бирге мәмлекетлик хызметлер көрсетиў бойынша жаратылған миллий система ҳәм оның әҳмийети ҳаққында халықты хабардар қылыў ушын бул аймақларда үгит-нәсият жумыслары алып барылмақта. Тийкарынан 16 мәрте ушырасыў ҳәм сәўбетлесиўлер өткерилди, 800 ден аслам буклет ҳәм флаерлер тарқатылды.

Бүгинги күнге шекем «Қараой» аўыл пуқаралар жыйынында 548 ҳәмде «Атакөл» аўыл пуқаралар жыйынында 536 көшпели мәмлекетлик хызметлер көрсетилди.

Атап айтқанда, бул аймақлардағы пуқаралардан балаларды мәмлекетлик мектепке шекемги билимлендириў мекемелерине қабыл етиў, инженерлик-коммуникация тармақларына таяр ҳалда жалғаў бойынша, қурылысы тамаланған турақ жай имаратын пайдаланыўға қабыллап алыў ҳәм басқада мәмлекетлик хызметлер бойынша, исбилерменлерди мәмлекетлик дизимнен өткериў бойынша көшпели мәмлекетлик хызметлер көрсетилип келинбекте.

Сондай-ақ Президентимиздиӊ 2018-жыл 20‑апрельдеги “Пуқараларды социаллық қоллап-қуўатлаў бойынша қосымша  ис-илажлар ҳәмде өз басымшалық пенен қурылған турақ жайларға байланыслы мүлик ҳуқықын белгилеў бойынша бир мәртелик улыўма мәмлекетлик акциясын өткериў ҳаққында”ғы 5421-санлы Пәрманы қабыл етилип, пәрманға муўапық өз басымшалық пенен ийелеп алынған жер участкаларында яки имарат қурыў ушын рухсатнама алмастан қурылған турақ жайларға байланыслы мүлик ҳуқықын белгилеў бойынша бир мәртелик улыўма мәмлекетлик акциясы жәрияланды.

Бул пәрманныӊ мазмун-мәнисин пуқараларға кеӊ түрде түсиндириў жумыслары алып барылып, “Абат аўыл” бағдарламасына киритилген аймақлардағы пуқаралардан бүгинги күнге шекем өз басымшалық пенен салынған яки имарат қурыў ушын рухсатнама алмастан қурылған 45 пуқараныӊ турақ жайларына мулик ҳуқуқын белгилеў бойынша район ҳәкиминиӊ шешими қабыл етилип, кадастр ҳүжжетлери исленип берилди.

 

 

Тахтакөпир районы
Мәмлекетлик хызметлер орайы қәнийгеси                                                                               Г.Даўлетиярова